係一部好好睇好好笑有少少深度嘅電影
其實已經睇完兩日
但係仲消化緊套電影想表達嘅訊息
好似有好多嘢想講俾觀眾知
又好似可以有好多唔同嘅解讀
不過睇戲之前建議睇一睇trailer
更加有助你了解劇中人物背景同觀賞部電影
幾鍾意呢個marketing 安排
又可以慳返啲時間唔洗係電影入面交代太多悶嘢
首先讚下啲演員先
主要出鏡有6個
除咗子華神，每一個都好出色
好有做喜劇潛質
每一個都可以搵到一個超水準發揮嘅一幕
尤其是林明禎係天台送禮果幕特別驚喜
估唔到佢做得咁好
另一個係王苑之
每一個鏡頭都可以見到啲細微小動作大大加深咗佢個角色
例如坐低食飯果陣會捉一捉陳湛文隻手之類
反而子華神冇乜亮眼表現
似乎仲係流於用金句留印象
但係啲金句好似有啲老土
可能係角色需要?
氣氛節奏方面導演掌握得好好
由搞笑到緊張轉認真又到返搞笑
轉得流暢不突兀
我認為歸功於運鏡
睇得出每個場景都諗過度過
係一個好窄小嘅單調嘅空間都影到好靚
笑位方面其實唔係啲令人印象深刻嘅笑話
但係就會令係開懷大笑笑足全場
因為有共鳴
都係大家日常會發生嘅場景
又唔係特別誇張咁演繹
最常見就係立flag 轉個頭就打臉
#劇透 #以下內容劇透
特別想講有兩個笑位
勾義嫂同whatsapp 分手 (pk?)
香港愈來愈多文盲同唔識用標點符號(笑)
寫到呢到就覺得特別難寫
首先佢好似講緊親情、愛情、婚姻
佢地三兄弟三對情侶其實各自面對唔同嘅問題
三佬最易理解
就係愛情與麵包
所以王苑之成日都提張愛玲
當大家都以為三佬事業有成喇愛情終於開花結果
編劇又嚟個反串
王苑之突然又現實咗務實咗
因為佢搵到自己
二佬嘅愛情好簡單
就係全力爭取
但係佢係個家入面迷失自己
佢覺得自己唔係一份子
但礙於身份束縛
佢覺得有啲嘢「應份」
所以成個人都好似好虛假咁
最後大佬
經常勉強自己
冇嘢 其實有嘢 但會令自己冇嘢
要令全屋人開心但從來冇諗自己開唔開心
看似長情 三年冇新對象
堅持唔賣樓
一開始我諗唔明點解
其實冇交代過任何確實原因 得所謂「樓在爐在老豆在」
後來明白原來只係佢自己嘅固執
唔願意走出confort zone
嚟到呢到就係我自己嘅過度解讀
係咪想講移民呢?
個家開始出現矛盾問題
大家有出走嘅意願
但係某啲人唔捨得唔願意唔敢走
二佬有身份認同問題
子華神同鄧麗欣嘅關係 (中港關係)
道不清說不明
剪不斷理還亂
最後都希望大家
打開門 走出去 走遠啲
唔好再淨係迷戀樓下嘅沙嗲牛麵
會唔會有啲關係
又唔係親情又唔係愛情又唔係友情
講唔到唔代表唔存在